Emapta O‘zbekistonni global xizmat ko‘rsatish amaliyotlarini kengaytirish uchun salohiyatli maydon sifatida ko‘rib chiqmoqda.

O‘zbekiston o‘zining global autsorsing markazlari tarmog‘ini kengaytirayotgan xalqaro kompaniyalar e’tiborini jalb etishda davom etmoqda. Ana shunday kompaniyalardan biri – autsorsing, Employer of Record (EOR) va taqsimlangan jamoalarni boshqarish bo‘yicha yechimlar taklif etuvchi xalqaro provayder bo‘lgan Emapta o‘z xalqaro tarmog‘ini yanada rivojlantirish uchun yangi yo‘nalishlarni ko‘rib chiqmoqda.

Global Business Services Forum 2026 (GBSF 2026) doirasida IT Park Uzbekistan’ning eksportni rivojlantirish bo‘yicha direktori Jahongir Kagirov Emapta asoschisi va bosh ijrochi direktori Tim Vorbax bilan uchrashdi. Tomonlar O‘zbekistonning kompaniya servis amaliyotlarini rivojlantirish uchun yangi maydon sifatidagi salohiyatini, mahalliy vakolatxona ochish, kadrlar tayyorlash va tajriba loyihalarini amalga oshirish imkoniyatlarini muhokama qildi.

2010-yilda tashkil etilgan Emapta 10 000 dan ortiq xodimga ega xalqaro autsorsing kompaniyasidir. Bugungi kunda uning faoliyat tarmog‘i Osiyo, Lotin Amerikasi va Yevropa mamlakatlarini qamrab olgan, mijozlari orasida esa AQSh, Kanada, Avstraliya, Yangi Zelandiya va Buyuk Britaniya kompaniyalari bor. So‘nggi yillarda Emapta o‘zining xalqaro miqyosdagi ishtirokini faol diversifikatsiya qilib, yanada rivojlanish uchun yangi yo‘nalishlarni izlamoqda.

Uchrashuv davomida IT Park Uzbekistan vakillari mamlakatning xalqaro servis markazlarini joylashtirish salohiyatini taqdim etib, kadrlar salohiyatiga, biznes yuritishning raqobatbardosh narxiga, davlat tomonidan qo‘llab-quvvatlash choralariga hamda IT Parkning oliy ta’lim muassasalari va ta’lim dasturlari bilan hamkorlikda mutaxassislar tayyorlash imkoniyatlariga alohida e’tibor qaratdi.

Shuningdek, tomonlar tajriba loyihalarini ishga tushirish, maxsus jamoalar tuzish va O‘zbekistonda Emapta operatsion markazini ochish imkoniyatlarini, qolaversa, hamkorlikni rivojlantirish bo‘yicha keyingi qadamlarni, jumladan, yo‘l xaritasini tayyorlash va o‘zaro hamkorlikning istiqbolli yo‘nalishlarini ishlab chiqish masalalarini muhokama qildi.