IT Park O‘zbekiston global IT markazi sifatidagi mavqeini mustahkamlashda davom etmoqda

2026-yilning birinchi yarmi IT Park Uzbekistan uchun navbatdagi jadal rivojlanish davri bo‘ldi. Bu xalqaro investorlar va texnologik kompaniyalarning mamlakat raqamli ekotizimiga bo‘lgan ishonchi tobora ortib borayotganini tasdiqlaydi.

2026-yil yanvar–iyun oylarida:

• 608 ta eksportga yo‘naltirilgan kompaniya IT Park rezidentiga aylandi, bu o‘tgan yilning shu davriga nisbatan 178% o‘sishni tashkil etdi.
• 297 ta xorijiy kapital ishtirokidagi kompaniya IT Park ekotizimiga qo‘shildi va bu 154% yillik o‘sishni qayd etdi.
• Yangi xorijiy korxonalar mamlakat bo‘ylab 3 000 dan ortiq yangi ish o‘rni yaratishni rejalashtirmoqda.

E’tiborga molik jihatlardan biri — O‘zbekiston hududlariga bo‘lgan qiziqishning ortib borayotgani. Yil boshidan buyon 138 ta xorijiy kapital ishtirokidagi kompaniya Toshkentdan tashqarida o‘z faoliyatini yo‘lga qo‘ydi, 257 ta yangi eksportga yo‘naltirilgan kompaniya esa hududlarda ro‘yxatdan o‘tdi. Bu xalqaro biznes vakillari mamlakat hududlarining malakali kadrlar salohiyati va investitsiya imkoniyatlarini tobora yuqori baholayotganidan dalolat beradi.

Xorijiy investorlarning eng yuqori qiziqishi Surxondaryo viloyati (34), Toshkent viloyati (31), Namangan viloyati (17) va Samarqand viloyatida (15) qayd etildi. Bu esa O‘zbekiston raqamli iqtisodiyotining geografiyasi tobora kengayib borayotganini ko‘rsatadi.

IT Park o‘zining xalqaro qamrovini ham kengaytirishda davom etmoqda. Bugungi kunda ekotizim 75 ta davlatdan kompaniyalarni birlashtiradi. Eng ko‘p yangi xorijiy rezidentlar AQSh, Xitoy, Turkiya va Yaponiya hissasiga to‘g‘ri kelmoqda. Eng yuqori o‘sish sur’atlari esa Janubiy Koreya (6 baravar), AQSh (3 baravar) va Xitoy (2 baravar) kompaniyalari tomonidan qayd etdi.

IT Park ekotizimi tobora diversifikatsiyalashib bormoqda. 2026-yilning birinchi yarim yilligi yakunlariga ko‘ra:

• 76% yangi rezidentlar IT xizmatlari sohasida faoliyat yuritadi;
• 19% biznes va bilim jarayonlari autsorsingi (BPO/KPO) yo‘nalishida ishlaydi;
• 4% GameDev va dizayn sohasiga ixtisoslashgan.

Bunday tarkib O‘zbekistonda dasturiy ta’minot ishlab chiqish, global biznes xizmatlari va boshqa texnologik yo‘nalishlarni qamrab olgan zamonaviy, ko‘p tarmoqli raqamli ekotizim shakllanayotganini ko‘rsatadi.

O‘rtacha har oy 100 ta eksportga yo‘naltirilgan kompaniya va 50 ta xorijiy kapital ishtirokidagi kompaniya IT Park rezidenti maqomini qo‘lga kiritdi. Bu O‘zbekistonning xalqaro IT va biznes xizmatlari uchun tobora jozibador yo‘nalishga aylanayotganini tasdiqlaydi.

Bugungi kunda O‘zbekistonda 1 095 ta xorijiy kapital ishtirokidagi kompaniya IT Park rezidenti sifatida faoliyat yuritmoqda. Bu esa mamlakatning innovatsiyalar, IT-xizmatlar eksporti va xalqaro investitsiyalarni jalb etish bo‘yicha mintaqaviy markaz sifatidagi mavqeini yanada mustahkamlamoqda.