IT Park Uzbekistan va AWS hamkorligida 10 ta universitetda AWS Academy dasturlari joriy etiladi

IT Park Uzbekistan Amazon Web Services (AWS) bilan hamkorlikda AWS Academy doirasida O‘zbekistonning 10 ta oliy ta’lim muassasasida sun’iy intellekt va bulutli hisoblash bo‘yicha o‘quv dasturlarini joriy etishini e’lon qildi. 

2026/2027-o‘quv yilidan boshlab muhandislik, kompyuter fanlari, axborot texnologiyalari va menejment yo‘nalishlari talabalari sun’iy intellekt, mashinaviy ta’lim, bulutli arxitektura, ma’lumotlar tahlili va kiberxavfsizlik sohalarida amaliy tajriba orttiradilar. Bu ko‘nikmalar O‘zbekistonning mintaqaviy IT-markazga aylanishi uchun zarurdir.

Ushbu tashabbus 2023-yil 2-may kuni Berlinda bo‘lib o‘tgan O‘zbekiston-Germaniya biznes-forumi doirasida O‘zbekiston Respublikasi Raqamli texnologiyalar vazirligi va AWS o‘rtasida imzolangan Anglashuv memorandumida mustahkamlangan kelishuvlarning davomidir. Hujjatda “Raqamli O‘zbekiston — 2030” strategiyasiga muvofiq raqamli transformatsiya, SI/MT sohasidagi ta’lim va tadqiqotlar, shuningdek, bulutli texnologiyalar siyosati bo‘yicha hamkorlik yo‘nalishlari belgilab berilgan.

Bu O‘zbekiston uchun nima uchun muhim?

“O‘zbekiston o‘z taraqqiyotining muhim bosqichida turibdi. Mamlakat aholisi 39 million kishini tashkil etadi, bu Markaziy Osiyo aholisining deyarli yarmiga tengdir. Shu bilan birga, O‘zbekiston aholisi yosh tarkibi bilan ajralib turadi: median yosh 27 yoshni tashkil etadi, aholining 30 foizdan ortig‘i esa 15 yoshgacha bo‘lganlardir. Bu shunchaki demografik ko‘rsatkich emas, balki butun bir avlod uchun imkoniyatdir. Agar yoshlarga zarur ko‘nikmalarni bersak, ular O‘zbekistonning bilimlar iqtisodiyotiga o‘tishida harakatlantiruvchi kuchga aylanishi mumkin. Aks holda, biz ularni xorijga mehnat migratsiyasi tufayli yo‘qotish xavfi ostida qolamiz. Bugungi kunda ishchi kuchimizning qariyb 10 foizi mamlakat tashqarisida mehnat qilmoqda”, — deya ta’kidladi IT Park Uzbekistan direktori Azamat Karamatov.

O‘zbekiston oliy ta’lim tizimi sezilarli darajada kengaydi: oliy ta’lim muassasalari soni 2020-yildagi 107 tadan 2024/2025-o‘quv yiliga kelib 222 taga yetdi, ya’ni 74,8 foizga oshdi. Biroq, birgina miqdoriy o‘sishning o‘zi yetarli emas.

Jahon iqtisodiy forumining “Future of Jobs Report 2025” hisobotiga ko‘ra, 2025–2030-yillarda O‘zbekistonda biznes transformatsiyasi uchun ko‘nikmalar tanqisligi asosiy muammo bo‘lib qoladi. Mamlakatdagi xodimlarning atigi 22 foizi o‘zining joriy ishi doirasida malakasini oshirishi kutilayotgan bo‘lsa, dunyo bo‘yicha o‘rtacha ko‘rsatkich 29 foizni tashkil etadi.

AWS Academy’ning sun’iy intellekt va bulutli texnologiyalar sohasidagi amaliy o‘quv dasturlarining bevosita ta’lim jarayoniga integratsiyalashuvi talabalarga oilasining moliyaviy ahvoli yoki universitetning joylashuvidan qat’i nazar, soha standartlariga mos bepul ta’lim olish imkonini beradi.

“Bu hamkorlik O‘zbekistonda texnologik kadrlarni rivojlantirishda yangi sahifa ochmoqda. AWS Academy talabalarimizga dunyoning yetakchi kompaniyalari foydalanadigan bulutli va SI vositalaridan to‘g‘ridan-to‘g‘ri amaliy foydalanish imkoniyatini taqdim etib, ularni ta’lim dasturlariga qo‘shimcha to‘lovlarsiz integratsiya qiladi. Biz shunchaki nazariyani o‘rgatmayapmiz, balki faoliyatining birinchi kunidanoq O‘zbekistonning raqamli iqtisodiyotini rivojlantirishga hissa qo‘sha oladigan amaliyotchi mutaxassislarni tayyorlayapmiz. Maqsadimiz aniq: 5 milliard dollarlik IT-xizmatlar eksporti va texnologiyalar sohasida 300 000 ta ish o‘rni. AWS Academy ushbu maqsadlarga erishish uchun zarur bo‘lgan kadrlar zaxirasini shakllantirishga yordam beradi”, — dedi IT Park Uzbekistan’ning SI va R&D yo‘nalishi rahbari Umida Odilova.

Talabalar va o‘qituvchilar nimalarga ega bo‘ladi?

Dasturda ishtirok etuvchi 10 ta OTM talabalari sun’iy intellekt, mashinaviy ta’lim, bulutli arxitektura, ma’lumotlar tahlili va kiberxavfsizlik bo‘yicha AWS Academy kurslaridan foydalanish imkoniyatiga ega bo‘ladilar.

Ular simulyatorlar bilan emas, balki bevosita AWS Management Console va real bulutli infratuzilma bilan ishlaydilar. Talabalar butun dunyo bo‘ylab millionlab kompaniyalar qo‘llaydigan vositalardan foydalangan holda ilovalar yaratish va amaliy masalalarni yechish imkoniyatiga ega bo‘ladilar.

Barcha 10 ta OTM o‘qituvchilari AWS Academy Certified Educator (ACE) akkreditatsiya jarayonidan o‘tadilar, bu esa ularga dasturlarni global sanoat standartlariga muvofiq o‘qitish imkonini beradi. Shuningdek, ular bulutli texnologiyalar va sun’iy intellekt sohasidagi jadal o‘zgarishlarni hisobga olgan holda ta’lim dolzarbligini saqlab qolish uchun kasbiy rivojlanish dasturlaridan foydalanish imkoniyatiga ega bo‘ladilar.

Jahon bankining IT Park bilan hamkorlikda amalga oshirayotgan “Uzbekistan Digital Inclusion Project” loyihasi raqamli sohadagi imkoniyatlardan teng foydalanishni kengaytirishga yo‘naltirilgan. Loyiha doirasida yangi IT-ish o‘rinlarining 50 foizi ayollarga, 4 foizi nogironligi bo‘lgan shaxslarga mo‘ljallanishi, shuningdek, 18 yoshdan 30 yoshgacha bo‘lgan 6 200 nafardan ortiq yosh mutaxassisning o‘qitilishi ko‘zda tutilgan. AWS Academy’ning bepul ta’lim modeli ushbu vazifalarga to‘la mos keladi.

Global missiyaning mahalliy ijrosi

“AWS butun dunyo bo‘ylab sun’iy intellekt va bulutli texnologiyalar sohasidagi ta’limdan foydalanish imkoniyatlarini kengaytirishga intiladi. Bu orqali o‘quvchilar yashash joyidan qat’i nazar, mehnat bozorining kelajagini belgilaydigan texnik ko‘nikmalarni rivojlantira oladilar. O‘zbekistonning yosh va jo‘shqin aholisi hamda hukumatning ulkan raqamli istiqbollari mamlakatni ushbu missiyada ideal hamkorga aylantiradi. Biz O‘zbekistonda AWS Academy’ni ishga tushirayotganimizdan va IT Park bilan sun’iy intellekt hamda bulutli texnologiyalar sohasida yangi avlod mutaxassislarini tayyorlashda hamkorlik qilayotganimizdan mamnunmiz”, — deb ta’kidladi Amazon Web Services kompaniyasining Markaziy Osiyo, Kavkaz va Mo‘g‘uliston bo‘yicha mintaqaviy menejeri Inna Ojogina.

AWS bulutli texnologiyalar bo‘yicha ko‘nikmalarni rivojlantirishga qaratilgan bepul tashabbuslar doirasida 200 ta mamlakat va hududda 31 milliondan ortiq kishini o‘qitib, dastlabki 29 million kishilik maqsadidan oshib ketdi.

Byudjeti 100 million dollarlik “AWS Education Equity Initiative” tashabbusi butun dunyo bo‘ylab yetarlicha vakillikka ega bo‘lmagan va ijtimoiy himoyaga muhtoj guruhlar talabalarini qo‘llab-quvvatlashga qaratilgan.

Qanday qo‘shilish mumkin? 

AWS Academy dasturi belgilangan talablarga javob beradigan oliy ta’lim muassasalariga bepul taqdim etiladi. Ishtirok etish istagida bo‘lgan O‘zbekiston oliy ta’lim muassasalari bevosita IT Park Uzbekistan’ga murojaat qilishlari yoki AWS Academy orqali ariza topshirishlari mumkin.

IT Park Uzbekistan haqida

IT Park Uzbekistan O‘zbekiston Respublikasi Raqamli texnologiyalar vazirligi huzurida faoliyat yuritadi va Prezident qaroriga asosan tashkil etilgan. Uning vazifasi mamlakat IT-ekotizimini rivojlantirish, startaplarni qo‘llab-quvvatlash, kadrlar tayyorlash, IT-xizmatlar eksportini yuksaltirish va imtiyozli soliq rejimi doirasida xalqaro texnologik kompaniyalarni jalb qilishdan iborat.

Tashkil etilganidan buyon 3 800 dan ortiq kompaniya, jumladan, 100 foiz xorijiy kapitalga ega 1 000 dan ziyod kompaniya IT Park rezidenti bo‘ldi.

IT Park’ning strategik maqsadlari IT-xizmatlar eksportini 5 milliard dollarga yetkazish, rezidentlar sonini 10 000 taga oshirish, texnologiya sektorida 300 000 dan ortiq ish o‘rni yaratish va 1 million kvadrat metr infratuzilmani barpo etishni o‘z ichiga oladi.

OAV uchun aloqa: IT Park Uzbekistan, Korporativ kommunikatsiyalar | press_name@outsource.gov.uz