IT Park Uzbekistan va HTP Kyrgyzstan Markaziy Osiyoda texnologik hamkorlikni kengaytirmoqda

Global Business Services Forum 2026 forumi (GBSF 2026) doirasida IT Park Uzbekistan bosh direktori Azamat Karamatov Qirg‘iziston Respublikasi Yuqori texnologiyalar parki (HTP Kyrgyzstan) direktori Azis Abakirov boshchiligidagi delegatsiya bilan uchrashdi. Uchrashuv avvalida Azis Abakirov IT Park Uzbekistan’ni tashkil etilganining 7 yilligi bilan tabriklab, uning yutuqlari va O‘zbekiston hamda Markaziy Osiyo texnologik ekotizimini rivojlantirishga qo‘shgan hissasini yuqori baholadi. Tomonlar, shuningdek, ikki tomonlama hamkorlikni kengaytirish, innovatsiyalar sohasida qo‘shma tashabbuslarni amalga oshirish va Markaziy Osiyoni yagona texnologik mintaqa sifatida ilgari surish istiqbollarini muhokama qildilar.

IT Park Uzbekistan va HTP Kyrgyzstan o‘rtasidagi hamkorlik 2021-yildan buyon rivojlanib kelmoqda, o‘shanda hamkorlik memorandumi imzolangan edi. Bu vaqt ichida tashkilotlar bir qator qo‘shma tashabbuslarni amalga oshirdilar, texnologik ekotizimlarni rivojlantirish, IT-xizmatlar eksportini qo‘llab-quvvatlash va mintaqaning xalqaro ishtirokini mustahkamlash bo‘yicha tajriba almashdilar.

Bugungi kunda HTP Kyrgyzstan 450 dan ortiq IT-kompaniyalarni birlashtiradi, ularda 3000 ga yaqin mutaxassis ishlaydi. Rezident kompaniyalar daromadining 90 foizdan ortig‘i Shimoliy Amerika, Yevropa va Osiyo mamlakatlariga dasturiy ta’minot va IT-xizmatlar eksportiga to‘g‘ri keladi. Park, shuningdek, Markaziy Osiyodagi IT-kompaniyalar uchun eng raqobatbardosh soliq rejimlaridan birini taklif etadi.

Uchrashuv davomida IT Park Uzbekistan vakillari HTP Kyrgyzstan’ni mintaqaning yetakchi innovatsion ekotizimlarini birlashtiruvchi Central Eurasia Innovation Hubs tashabbusiga qo‘shilishga taklif qildilar. Tomonlar mintaqaviy innovatsion ekotizimlarni rivojlantirish, poytaxtlardan tashqarida texnologik markazlarni qo‘llab-quvvatlash, malakali mutaxassislarni tayyorlash va yuqori texnologiyali loyihalarga investitsiyalarni jalb qilish bo‘yicha hamkorlik istiqbollarini muhokama qildilar.

Xalqaro texnologik kompaniyalar, investorlar va strategik hamkorlarni jalb qilish, shuningdek, Markaziy Osiyoni IT-biznes va global xizmat ko‘rsatish markazlarini rivojlantirish uchun istiqbolli mintaqa sifatida ilgari surish bo‘yicha qo‘shma qadamlar alohida mavzu bo‘ldi.

Uchrashuv yakunida IT Park Uzbekistan va HTP Kyrgyzstan strategik hamkorlikni kengaytirish, yangi qo‘shma loyihalarni ishga tushirish va raqamli iqtisodiyot, innovatsiyalar va IT-xizmatlar eksporti sohasidagi hamkorlikni mustahkamlashga tayyor ekanliklarini tasdiqladilar.