IT Park Uzbekistan va Neowiz GameDev sohasidagi hamkorlikni rivojlantirish masalalarini muhokama qildi

Koreya Respublikasiga tashrif doirasida IT Park Uzbekistan Ijrochi direktori Jahongir Radjabov videoo‘yinlarni ishlab chiqish va nashr etish sohasida faoliyat yurituvchi Janubiy Koreya kompaniyalaridan biri Neowiz Corporation rahbariyati bilan muzokaralar o‘tkazdi.

Tomonlar Neowiz’ning O‘zbekiston va Markaziy Osiyo bozorlariga chiqish imkoniyatlari, mamlakatda faoliyat yuritish shartlari, IT Park ishtirokchisi maqomini olish va mavjud soliq imtiyozlari, shuningdek, mahalliy GameDev kompaniyalari bilan hamkorlik qilish hamda MDH bozorlariga chiqish istiqbollarini muhokama qildi.

Neowiz vakillari O‘zbekistonni ikki asosiy yo‘nalishda ko‘rib chiqayotganini ta’kidladi: MDH bozorlarida faoliyat yuritish uchun mintaqaviy platforma sifatida va GameDev hamda IT sohasidagi rus tilida so‘zlashuvchi mutaxassislarni jalb etish salohiyatiga ega mamlakat sifatida. Kompaniya mahalliy bozor va texnologik ekotizim haqida qo‘shimcha ma’lumot olishga qiziqish bildirdi.

IT Park Uzbekistan xorijiy IT-kompaniyalar uchun mavjud imkoniyatlar, jumladan IT Park ishtirokchisi maqomini olish shartlari, amaldagi soliq imtiyozlari va qo‘llab-quvvatlash choralari haqida ma’lumot taqdim etdi. Shuningdek, O‘zbekistondan Markaziy Osiyo va MDH bozorlariga chiqish uchun platforma sifatida foydalanish imkoniyatlari alohida taqdim etildi.

Kompaniya O‘zbekiston va mintaqada mahalliy hamkorlar hamda o‘yin nashriyotchilarini izlashga ham qiziqish bildirdi. IT Park Uzbekistan tegishli bozor ishtirokchilari bilan aloqalarni yo‘lga qo‘yish va hamkorlikning mumkin bo‘lgan formatlarini ishlab chiqishga ko‘maklashishga tayyorligini bildirdi.

Uchrashuv yakunida tomonlar muloqotni davom ettirishga kelishib oldi. IT Park Uzbekistan Neowiz’ga mahalliy GameDev ekotizimi, kompaniyalar va hamkorlikning potensial yo‘nalishlari haqida qo‘shimcha ma’lumot taqdim etadi, shuningdek, mahalliy hamkorlar va nashriyotchilar bilan aloqalarni yo‘lga qo‘yishga ko‘maklashadi.

Neowiz vakillariga, shuningdek, mamlakatda biznes yuritish imkoniyatlarini yanada o‘rganish vositalaridan biri sifatida Enterprise Uzbekistan platformasi taqdim etildi.

Xalqaro GameDev kompaniyalari bilan hamkorlik mahalliy o‘yin industriyasini rivojlantirish, O‘zbekiston dasturchilarining xalqaro aloqalarini kengaytirish va raqamli mahsulotlar eksporti uchun qo‘shimcha imkoniyatlar yaratishga xizmat qilishi mumkin.

Neowiz Corporation — 1997-yilda tashkil etilgan va Seongnam shahrida joylashgan Janubiy Koreya texnologik kompaniyasi. Kompaniya PC, konsol va mobil platformalar uchun videoo‘yinlarni ishlab chiqish va nashr etishga ixtisoslashgan. Unda qariyb 900 nafar xodim faoliyat yuritadi, yillik daromadi taxminan 320 mln AQSh dollarini tashkil etadi, daromadining yarmidan ko‘pi esa xorijiy bozorlardan shakllanadi.