IT Park va Toshkentdagi Inha universiteti IT-sanoati uchun kadrlar salohiyatini rivojlantirish masalalarini muhokama qildi

IT Park Uzbekistan Toshkentdagi Inha universiteti bilan hamkorlikda IT Park rezidentlari ishtirokida kadrlar salohiyatini rivojlantirish, mutaxassislar tayyorlash tizimini takomillashtirish hamda ta’lim sohasi va IT-biznes o‘rtasidagi hamkorlikni mustahkamlashga bag‘ishlangan uchrashuv o‘tkazdi.

Uchrashuv davomida kompaniyalar vakillari bozorning dolzarb ehtiyojlari bilan o‘rtoqlashib, IT-sanoatining o‘sib borayotgan talablarini hisobga olgan holda yanada rivojlantirilishi zarur bo‘lgan ustuvor yo‘nalishlarni belgilab berdilar.

Asosiy mavzulardan biri kiberxavfsizlik bo‘ldi. Ishtirokchilar ushbu yo‘nalishdagi ta’lim dasturlarini rivojlantirish hamda axborot xavfsizligi sohasida zamonaviy sanoat talablariga javob beradigan malakali mutaxassislarni tayyorlash zarurligini alohida ta’kidladilar.

Shuningdek, sun’iy intellekt yo‘nalishini yanada rivojlantirish, tegishli ko‘nikmalarni kuchaytirish hamda AI texnologiyalarini real biznes vazifalarini hal etish va raqobatbardosh texnologik yechimlar yaratishda qo‘llay oladigan mutaxassislarni tayyorlash masalalari muhokama qilindi.

Soft skillsni rivojlantirishga ham alohida e’tibor qaratildi. Biznes vakillari texnik bilimlar bilan bir qatorda, muloqot, jamoada ishlash, tanqidiy fikrlash, yetakchilik va boshqa universal ko‘nikmalar IT-kompaniyalarda samarali faoliyat yuritish uchun tobora muhim ahamiyat kasb etayotganini qayd etdilar. 

Bundan tashqari, ishtirokchilar talabalarning stajirovkasi va amaliy tayyorgarligi masalalarini ko‘rib chiqdilar. Talabalar va kompaniyalar o‘rtasidagi hamkorlikni yanada kuchaytirish imkoniyatlari, shuningdek, stajirovkalarni tashkil etishning tashkiliy va huquqiy jihatlari muhokama qilindi. Mumkin bo‘lgan mexanizmlardan biri sifatida universitet, talaba va kompaniya o‘rtasida uch tomonlama kelishuv tuzish taklif etildi.

Yana bir muhim yo‘nalish ta’lim dasturlarini bozor talablariga mos ravishda rivojlantirish bo‘ldi. IT Park rezidentlari mutaxassislarga qo‘yilayotgan dolzarb talablarni bildirib, o‘quv dasturlarini shakllantirish va takomillashtirishda biznesning real ehtiyojlarini hisobga olish muhimligini ta’kidladilar.

Uchrashuv universitet va IT-sanoati o‘rtasida ochiq muloqot uchun samarali maydon bo‘lib, biznes vakillariga bozorning dolzarb ehtiyojlari, mutaxassislarga qo‘yilayotgan talablar hamda kadrlar tayyorlash tizimini takomillashtirish bo‘yicha takliflarini bevosita bildirish imkonini berdi.

IT Park Uzbekistan, universitetlar va rezidentlar o‘rtasidagi hamkorlik IT-sanoatining istiqbolli yo‘nalishlarini rivojlantirish, malakali mutaxassislar tayyorlash va O‘zbekiston raqamli iqtisodiyotining izchil o‘sishini qo‘llab-quvvatlaydigan kuchli kadrlar salohiyatini shakllantirishga xizmat qiladi.