O‘zbekiston va Gonkong innovatsion ekotizimlar o‘rtasidagi hamkorlikni mustahkamlamoqda

Oʻzbekistonning Markaziy Osiyo va jahon bozorlari oʻrtasidagi muhim texnologik koʻprikka aylanish yoʻlidagi intilishlari joriy hafta Gonkong maxsus ma’muriy hududi rahbari Jon Li Ka-chiu boshchiligidagi delegatsiyaning Toshkentga tashrifi bilan yangi bosqichga koʻtarildi.

Tashrif innovatsion hamkorlikni mustahkamlashda muhim qadam bo‘ldi: uning yakunida IT Park Uzbekistan, IT Park Ventures va Gonkong Savdoni rivojlantirish kengashi (HKTDC) o‘rtasida strategik bitimlar, shuningdek, IT Park Uzbekistan va Hong Kong Cyberport Management Company Limited o‘rtasida innovatsiyalar, venchur investitsiyalar va xalqaro texnologik biznes sohasida hamkorlikni rivojlantirishga qaratilgan ikki tomonlama bitim imzolandi.

O‘zbekiston Respublikasi Raqamli texnologiyalar vazirligi va IT Park Uzbekistan hamkorligida tashkil etilgan tashrif Markaziy Osiyoning eng tez rivojlanayotgan raqamli iqtisodiyotlaridan biri va Osiyoning yetakchi moliyaviy hamda innovatsion markazlaridan biri o‘rtasidagi aloqalarni mustahkamlash bo‘yicha keng qamrovli strategiyani aks ettiradi.

Uchrashuvlar davomida ishtirokchilarga O‘zbekistonning jadal rivojlanayotgan texnologik ekotizimi taqdim etildi. Mamlakatning xalqaro texnologik kompaniyalar, venchur kapital va startaplarni jalb qilish borasidagi sa’y-harakatlariga alohida e’tibor qaratildi. Muhokama nafaqat investitsiya imkoniyatlari, balki uzoq muddatli rivojlanish uchun shart-sharoitlar yaratish — inson kapitalini rivojlantirish, tadbirkorlikni qo‘llab-quvvatlash va xalqaro bozorlardagi ishtirokni kengaytirish masalalarini ham qamrab oldi.

Dastur doirasida Raqamli texnologiyalar vazirining raqamlashtirish masalalari bo‘yicha birinchi o‘rinbosari Ayubxon Sultonov boshchiligida davra suhbati bo‘lib o‘tdi. Gonkong delegatsiyasi, Raqamli texnologiyalar vazirligi, IT Park Uzbekistan va boshqa tashkilotlar vakillari raqamli transformatsiya, innovatsiyalar hamda iqtisodiy rivojlanish sohasidagi hamkorlikning yangi yo‘nalishlarini muhokama qildilar.

Imzolangan kelishuvlardan tashqari, tomonlar Gonkongning boshqa yetakchi innovatsion institutlari, jumladan, Hong Kong Science and Technology Parks Corporation (HKSTP) va Hong Kong-Shenzhen Innovation and Technology Park bilan hamkorlik istiqbollarini ham ko‘rib chiqdilar. Ushbu tashabbus O‘zbekiston va Gonkong innovatsion ekotizimlari o‘rtasida uzoq muddatli hamkorlikni shakllantirish hamda aloqalarni mustahkamlashga qaratilgan.

So‘nggi yillarda raqamli iqtisodiyot va xalqaro texnologik hamkorlikni rivojlantirishga faol sarmoya kiritayotgan O‘zbekiston uchun ushbu tashrif mamlakatni Markaziy Osiyo va jahon innovatsiyalar markazlari o‘rtasidagi bog‘lovchi bo‘g‘inga aylantirish, har ikki tomon tadbirkorlari, investorlari va texnologik kompaniyalari uchun yangi imkoniyatlar yaratishga qaratilgan kengroq strategiyaning tasdig‘i bo‘ldi.