Toshkentda IOI 2026 xalqaro informatika olimpiadasi boshlandi

Toshkentda O‘zbekistonda ilk bor o‘tkazilayotgan 38-xalqaro informatika olimpiadasi (IOI 2026) start oldi. IT Park Uzbekistan maktab o‘quvchilari o‘rtasidagi sport dasturlash bo‘yicha dunyoning eng yirik musobaqalaridan birining hamkori sifatida ishtirok etmoqda.

9–16-avgust kunlari bo‘lib o‘tadigan olimpiadada AQSh, Xitoy, Germaniya, Singapur, Koreya Respublikasi, Yaponiya va Buyuk Britaniya kabi 97 dan ortiq mamlakatdan 386 nafar o‘quvchi qatnashmoqda. Kuzatuvchilar, mehmonlar va xalqaro qo‘mitalar a’zolari bilan birga ishtirokchilarning umumiy soni 900 nafardan oshadi.

IOI 1989-yildan buyon har yili o‘tkazib kelinadi va u maktab o‘quvchilari o‘rtasidagi sport dasturlash bo‘yicha eng yirik xalqaro musobaqalardan biri hisoblanadi. Ishtirokchilar algoritmik masalalarni yechish bo‘yicha besh soatlik ikkita turni o‘tkazadilar. Shuningdek, dasturdan seminarlar, mahorat darslari va Toshkent bo‘ylab ekskursiyalar o‘rin olgan.

O‘zbekiston IOIni o‘tkazish huquqini 2023-yilda olimpiada Bosh assambleyasi qarori bilan qo‘lga kiritgan. 2025-yilda Boliviyada o‘tgan musobaqaning yopilish marosimida mamlakatimizga IOI bayrog‘i topshirildi. O‘sha yerda O‘zbekiston terma jamoasi kumush va bronza medallarini qo‘lga kiritib, o‘z tarixidagi eng yaxshi natijani qayd etdi.

O‘zbekiston Respublikasi raqamli texnologiyalar vaziri Sherzod Shermatov IOI 2026 olimpiadasining o‘tkazilishi IT-ta’limni rivojlantirish, iqtidorli yoshlarni qo‘llab-quvvatlash va zamonaviy raqamli ekotizimni shakllantirish borasidagi ko‘p yillik sa’y-harakatlar samarasi ekanini ta’kidladi. Uning so‘zlariga ko‘ra, milliy terma jamoaning natijalari ham inson kapitalini rivojlantirish va yosh mutaxassislarni tayyorlash bo‘yicha tizimli ishlar samaradorligini tasdiqlaydi.

Shuningdek, u olimpiada alohida xalqaro tadbir sifatida emas, balki kengroq qamrovli “Raqamli O‘zbekiston – 2030” strategiyasining bir qismi sifatida ko‘rib chiqilayotganini qayd etdi. 

“Yosh iste’dod jahonning eng yuqori marrasi bilan qanchalik erta yuzlashsa, global bozorda raqobatlasha oladigan mutaxassislarning yangi avlodi shunchalik tez voyaga yetadi. Avgust oyida Toshkent sayyoramizning 386 nafar eng yaxshi yosh aql sohiblari O‘zbekistonni biz ko‘rayotgandek – ochiq, ulkan maqsadli va yuksalayotgan texnologik mamlakat sifatida ko‘radigan maskanga aylanadi”, – deb ta’kidladi Sherzod Shermatov.

O‘zbekiston mezbon mamlakat sifatida sakkiz nafar ishtirokchidan iborat ikkita jamoa bilan qatnashmoqda.

Birinchi jamoa tarkibidan Jahongirshoh Avazxonov, Timur Qodirbergenov, Jahonali Haydaraliyev va Ulug‘bek Rahmatullayev o‘rin olgan. Ikkinchi jamoa tarkibiga esa Sardor Salimov, Humoyun Abduraupov, Ulug‘bek Kamolov va Ravshan Rahmiddinov kiritilgan.

Ishtirokchilar Namangan va Navoiy viloyatlari, Qoraqalpog‘iston Respublikasi hamda Toshkent shahri vakillaridir. Ular Prezident maktablari, Muhammad al-Xorazmiy nomidagi maktab, Vestminster litseyi va TATU qoshidagi litseyda tahsil oladi.

Terma jamoaga tayyorgarlik 2025-yilning noyabr oyidan boshlangan. Shu vaqt mobaynida to‘qqizta o‘quv-mashg‘ulot yig‘ini, jumladan, Ruminiya va Qozog‘istondagi xalqaro lagerlar o‘tkazildi. Tayyorgarlik jarayoniga Ruminiya, Polsha va Qozog‘istondan murabbiylar hamda 18 yillik tajribaga ega psixolog jalb etildi.

O‘zbekiston terma jamoasi a’zosi va IOI 2025 bronza medali sovrindori Ulug‘bek Rahmatullayev jamoaning uzoq tayyorgarlik ko‘rganini va musobaqada eng yuqori natijani ko‘rsatish niyatida ekanini ta’kidladi. Uning so‘zlariga ko‘ra, olimpiadaning Toshkentda o‘tkazilishi ishtirokchilarga nafaqat dunyoning eng kuchli o‘quvchilari bilan bellashish, balki xorijiy delegatsiyalarni O‘zbekiston bilan tanishtirish imkoniyatini ham beradi.

“Xalqaro informatika olimpiadasida O‘zbekiston sharafini himoya qilish biz uchun katta sharafdir. Biz bu musobaqaga uzoq vaqt tayyorlandik va g‘alaba uchun bor kuch-g‘ayratimizni ishga solamiz”, – dedi Ulug‘bek Rahmatullayev. 

IOI 2026 olimpiadasini o‘tkazish “Raqamli O‘zbekiston – 2030” strategiyasi hamda IT-ta’limni rivojlantirish va yosh mutaxassislarni tayyorlash ishlarining bir qismidir. IT Park Uzbekistan olimpiada hamkori sifatida texnologik iste’dodlarni rivojlantirishni hamda yoshlarning dasturlash va STEM yo‘nalishlariga bo‘lgan qiziqishini qo‘llab-quvvatlaydi.

O‘zbekiston tomonidan olimpiadaning tashkilotchisi O‘zbekiston Respublikasi Raqamli texnologiyalar vazirligi hisoblanadi. 2027-yilda IOI Germaniyada bo‘lib o‘tadi.