IT Park Uzbekistan yoshlar uchun ishga joylashish imkoniyatlarini kengaytirmoqda

O‘zbekistonda mahalliy va xalqaro kompaniyalar, jumladan IT Park Uzbekistan rezidentlari faoliyatining kengayib borishi nafaqat poytaxtda, balki mamlakat hududlarida ham yangi ish o‘rinlarining yaratilishiga xizmat qilmoqda. Yangi imkoniyatlar tajribali mutaxassislar bilan bir qatorda, professional faoliyatini endi boshlayotgan talabalar va bitiruvchilar uchun ham yaratilmoqda.

Ish beruvchilar va ish izlovchilar o‘rtasidagi tizimli hamkorlikni yo‘lga qo‘yish maqsadida IT Park Uzbekistan nomzodlarning kasbiy tajribasi, mutaxassisligi, til ko‘nikmalari va afzal ko‘rgan bandlik shakli hisobga olinadigan yagona nomzodlar bazasini shakllantirmoqda. 

Bazadan ro‘yxatdan o‘tgan nomzodlarning rezyumelari tegishli vakant lavozimlar mavjud bo‘lganda va mutaxassislarga mos talab shakllanganda yirik xalqaro va mahalliy kompaniyalarga, jumladan IT Park Uzbekistan rezidentlariga yuborilishi mumkin. Bu ish beruvchilarga ochiq lavozimlar uchun mos nomzodlarni ko‘rib chiqish, ish izlovchilarga esa o‘z professional profilini potensial ish beruvchilarga taqdim etish uchun qo‘shimcha imkoniyat yaratadi. 

Tashabbus O‘zbekistonning barcha hududlarini qamrab oladi hamda tajribali mutaxassislar bilan bir qatorda, professional yo‘lini endi boshlayotgan talabalar va yaqinda oliy ta’lim muassasasini tamomlagan bitiruvchilarga ham mo‘ljallangan. 

Kompaniyalar talabi faqat an’anaviy IT-kasblar bilan cheklanmaydi. Dasturchilar, QA-muhandislar, ma’lumotlar bilan ishlash bo‘yicha mutaxassislar va dizaynerlardan tashqari, marketing, savdo, mijozlarga xizmat ko‘rsatish, moliya, buxgalteriya hamda ma’muriy boshqaruv yo‘nalishlaridagi mutaxassislarga ham talab mavjud. BPO va call-markaz yo‘nalishlari uchun kadrlarga bo‘lgan ehtiyoj ham alohida ortib bormoqda.

Xorijiy tillarni biladigan mutaxassislarga ham talab yuqori. Xalqaro bozorlarda faoliyat yuritadigan va xorijiy mijozlar bilan ishlaydigan kompaniyalar uchun ingliz, rus, nemis, fransuz, ispan, turk, arab, xitoy, yapon va koreys tillarini biladigan nomzodlar ayniqsa dolzarb hisoblanadi.

Muayyan ish beruvchining talablaridan kelib chiqib, nomzodlarga ofisda, gibrid yoki masofaviy ishlash formatlari taklif etilishi mumkin. Bu hududlardagi nomzodlar uchun qo‘shimcha imkoniyatlar yaratib, mutaxassislarni izlash geografiyasini Toshkentdan tashqariga ham kengaytiradi.

Nomzodlar bazasini shakllantirish vositalaridan biri Talent Park loyihasidir. Maxsus bot orqali ish izlovchilar o‘z rezyumelarini yuborishi, tajribasi, ko‘nikmalari va professional yo‘nalishi haqida asosiy ma’lumotlarni taqdim etishi mumkin. Tegishli vakant lavozimlar paydo bo‘lganda, ularning profillari yirik mahalliy va xalqaro kompaniyalar, jumladan IT Park Uzbekistan rezidentlari ko‘rib chiqishi uchun yuborilishi mumkin.

Bundan tashqari, dolzarb karyera imkoniyatlari va ochiq vakansiyalar haqidagi ma’lumotlar loyihaning Telegram-kanalida e’lon qilib boriladi.

Bazadan ro‘yxatdan o‘tish avtomatik tarzda ishga joylashishni anglatmaydi va ish o‘rniga ega bo‘lishni kafolatlamaydi. Shu bilan birga, u mutaxassislarga o‘z professional profilini IT Park Uzbekistan ekotizimidagi kompaniyalarga taqdim etish hamda keyingi nomzodlarni tanlash jarayonlarida inobatga olinishi uchun qo‘shimcha imkoniyat yaratadi.

Shu tariqa, loyiha mutaxassislarning O‘zbekistonning rivojlanib borayotgan IT, BPO va xizmat ko‘rsatish sohalarida yaratilayotgan imkoniyatlardan foydalanish doirasini kengaytirishga, kompaniyalarga esa zarur kadrlarni tezroq topishga ko‘maklashadi.

Bunday vositalarni rivojlantirish, shuningdek, hududlardagi kadrlar salohiyati hamda mutaxassislar qaysi yo‘nalishlarda ishlashga qiziqayotgani haqida yanada to‘liq tasavvur shakllantirish imkonini beradi. 

Rezyumeni @talent_park_bot orqali yuborish, dolzarb imkoniyatlarni esa @talentparkuz Telegram-kanali orqali kuzatib borish mumkin.