O‘zbekiston Global Tech Weekend tadbirida ishtirok etdi

23–27-mart kunlari Palo Alto va San Fransisko shaharlarida Global Tech Weekend — startap asoschilari, investorlar va texnologiya sohasi vakillarini birlashtirgan tadbirlar seriyasi bo‘lib o‘tdi.

Dastur doirasida IT Park Uzbekistan hamkori — Silkroad Innovation Hub o‘zbek mahsulot kompaniyalari bilan birgalikda xalqaro hamjamiyatga mamlakat imkoniyatlari va IT Park Uzbekistan ekotizimi haqida ma’lumot berdi.

26-mart kuni yangi texnologik ekotizimlarni rivojlantirishga bag‘ishlangan panel sessiyasi bo‘lib o‘tdi. Unda ishtirokchilar infratuzilma, professional hamjamiyatlar va investitsiya imkoniyatlari qanday shakllanishi, shuningdek, mahalliy bozorlarni global texnologik muhitga integratsiya qilish vositalari haqida fikr almashdi. Spikerlar orasida Mirasoft bosh direktori va asoschisi Timur Ganiev hamda Silkroad Innovation Hub vakili Shoxrux Ibragimov ishtirok etdi.

Muhokama davomida IT Park Uzbekistan xalqaro kompaniyalar uchun O‘zbekiston bozoriga kirishdagi muhim nuqtalardan biri sifatida qayd etildi. Spikerlar mamlakatda biznesni boshlash va rivojlantirish imkoniyatlari, shuningdek, xorijiy kompaniyalar uchun mavjud qo‘llab-quvvatlash choralari haqida so‘z yuritdi.

Dastur doirasida Silicon Valley vakillari — investorlar, tadbirkorlar va kompaniya rahbarlari bilan biznes uchrashuvlar ham tashkil etildi. Ushbu format to‘g‘ridan-to‘g‘ri aloqalar o‘rnatish va O‘zbekiston salohiyatini yuqori darajadagi professional auditoriyaga taqdim etish imkonini berdi.

IT Park Uzbekistan hamkorlarining bunday xalqaro tashabbuslardagi ishtiroki mamlakatni global miqyosda targ‘ib qilish va O‘zbekistonda texnologik biznesni rivojlantirish imkoniyatlariga e’tiborni jalb etishga xizmat qiladi.