Belarus IT-kompaniyalari Navoiy viloyati va Qoraqalpog‘iston Respublikasida o‘z filiallarini ochishni rejalashtirmoqda

Raqamli texnologiyalar vazirligining Qoraqalpog‘iston Respublikasi va Navoiy viloyati hududiy boshqarmalari boshliqlari, shuningdek, IT Park Uzbekistan’ning Qoraqalpog‘iston Respublikasi va Navoiy viloyatidagi hududiy filiallari bosh menejerlaridan iborat O‘zbekiston Respublikasi delegatsiyasi xalqaro hamkorlikni kengaytirish va mamlakat hududlariga yangi IT-kompaniyalarni jalb qilish maqsadida Belarus Respublikasiga amaliy tashrif bilan bordi.

Belarus IT-kompaniyalari va texnologik tashkilotlari vakillari bilan o‘tkazilgan bir qator uchrashuvlarda O‘zbekiston delegatsiyasi O‘zbekistonning raqamli ekotizimi imkoniyatlarini taqdim etib, Navoiy viloyati va Qoraqalpog‘iston Respublikasining salohiyatiga alohida e’tibor qaratdi. Ishtirokchilarga davlat tomonidan qo‘llab-quvvatlashning amaldagi choralari, jumladan, IT Park Uzbekistan rezidentlari uchun soliq imtiyozlari, "Zero Risk," "Local2Global," "IT Visa" dasturlari, shuningdek, eksportga yo‘naltirilgan IT-biznesni rivojlantirishga qaratilgan boshqa vositalar taqdim etildi.

Muzokaralar yakunida Navoiy viloyati va Qoraqalpog‘iston Respublikasida IT Park rezidentlari bo‘lgan bir qator Belarus kompaniyalarining filiallarini ochish bo‘yicha dastlabki kelishuvlarga erishildi. Bundan tashqari, tomonlar dasturiy ta’minotni ishlab chiqish, qo‘shma texnologik loyihalarni amalga oshirish va IT-xizmatlar eksporti sohasida hamkorlikni rivojlantirishga kelishib oldilar.

Ishbilarmonlik dasturi doirasida O‘zbekiston delegatsiyasi vakillari Belarusda amalga oshirilayotgan "Aqlli shahar" loyihalari bilan ham tanishib, raqamli infratuzilma, aqlli shahar xizmatlari va innovatsion shaharsozlik sohasidagi zamonaviy yechimlarni o‘rgandi. Olingan tajribadan O‘zbekiston hududlarida raqamli transformatsiya loyihalarini amalga oshirishda foydalanish rejalashtirilgan.

Erishilgan kelishuvlarni amalga oshirish hududlardan IT-xizmatlar eksporti hajmini sezilarli darajada oshirish imkonini berishi kutilmoqda. Xususan, Navoiy viloyatida IT-xizmatlar eksportining yillik o‘sishi 4 million AQSH dollariga yetishi prognoz qilinmoqda, bu esa viloyatning umumiy eksport hajmini 10 million AQSH dollariga yetkazish imkonini beradi.

Ushbu biznes missiyasi O‘zbekiston hududlariga xorijiy texnologik kompaniyalarni jalb qilish, xalqaro hamkorlikni mustahkamlash, yangi yuqori malakali ish o‘rinlarini yaratish va mamlakatning mintaqaviy IT-ekotizimini yanada rivojlantirish yo‘lidagi navbatdagi qadam bo‘ldi.