Berlitz va IT Park mutaxassislarning til tayyorgarligi sohasida hamkorlikni muhokama qildi

IT Park Uzbekistan’da IT Park bosh direktori Abdulaxad Kuchkarov va “Berlitz Philippines” hamda “Berlitz Uzbekistan” kompaniyalari bosh direktori Forchun Joy F. de Lara o‘rtasida uchrashuv bo‘lib o‘tdi. Uchrashuvda IT Park xizmatlar eksportini rivojlantirish bo‘yicha direktori Mahliyo Muksinova va boshqa tashkilotlar vakillari ham ishtirok etdilar.

Berlitz Corporation — 145 yildan ortiq tajribaga ega bo‘lgan dunyodagi yetakchi til va madaniy ta’lim provayderi. Kompaniya 70 ta mamlakatda faoliyat yuritib, 50 dan ortiq tilni o‘rgatadi. Ular sinovdan o‘tgan “Berlitz” metodikasidan foydalanadi — bu birinchi darslardan boshlab yangi tilda gapira boshlashga yordam beradigan immersiv, kommunikativ yondashuvdir. “Berlitz” ixtisoslashgan sohalar, jumladan, autsorsing, tibbiyot va korporativ tarmoqlar uchun kadrlar tayyorlashda ulkan tajribaga ega. O‘qitish nafaqat til ko‘nikmalarini rivojlantirishga, balki xalqaro muhitda muvaffaqiyatli ishlash uchun zarur bo‘lgan madaniyatlararo kompetensiyani shakllantirishga ham qaratilgan.

Uchrashuvda kadrlarning til tayyorgarligi sohasida, shu jumladan tez rivojlanayotgan biznes jarayonlari autsorsingi sektori uchun hamkorlikni mustahkamlash istiqbollari muhokama qilindi. “Berlitz” vakillarining aytishicha, kompaniya Filippindagi “Accenture” va 100 dan ortiq boshqa kompaniyalar kabi autsorsingga yo‘naltirilgan yirik mijozlar bilan ishlash bo‘yicha keng tajribaga ega. Endilikda ushbu tajribani O‘zbekistonga ham moslashtirish rejalashtirilmoqda.

2022-yildan buyon “Berlitz Uzbekistan” mutaxassislarni nemis tiliga muvaffaqiyatli o‘qitib kelmoqda: 1000 nafar hamshira noldan B2 darajasigacha o‘qitildi, ularning yarmi allaqachon Germaniya tibbiyot muassasalarida ish bilan ta’minlangan. Shuningdek, “Berlitz” ingliz tilini o‘qitish imkoniyatlarini kengaytirish maqsadida “IELTS” sertifikatlash bo‘yicha Britaniya Kengashi bilan hamkorlikni boshladi.

“Maqsadimiz — yosh mutaxassislarimizning shu yerda, O‘zbekistonda qolib, rivojlanishi, shu bilan birga, xalqaro standartlar darajasida daromad topishi uchun barcha zarur sharoitlarni yaratishdir. “Berlitz” kabi hamkorlar bilan sheriklik bizga autsorsing sohasi uchun talab yuqori bo‘lgan kadrlarni tayyorlash uchun yangi imkoniyatlar ochadi,” — dedi Abdulaxad Kuchkarov.

“O‘zbekistonda til akademiyalarining ochilishi alohida ahamiyatga ega. Mamlakatning jadal rivojlanishi va hukumatning inson kapitaliga sarmoya kiritishga ustuvor ahamiyat qaratishi sharoitida bunday tashabbuslar yoshlarning kelajagiga muhim hissa qo‘shmoqda. Xorijiy tillarni, ayniqsa nemis, yapon, koreys va arab tillarini biladigan mutaxassislarga bo‘lgan talab tobora ortib bormoqda va bunday ta’lim platformalarining rivojlanishi yangi avlodlar uchun kasbiy o‘sish imkoniyatlarini kengaytirmoqda,” — deya qo‘shimcha qildi Mahliyo Muksinova.    

“Biz autsorsing yo‘nalishining o‘ziga xos xususiyatlarini tushunamiz va global sanoat talablariga javob beradigan mutaxassislarni qanday tayyorlashni bilamiz. Bizning metodologiyamiz Filippinda o‘z samaradorligini isbotladi, u yerda allaqachon 100 dan ortiq kompaniya bizning mijozlarimizga aylandi, jumladan, biz 15 yildan ortiq hamkorlik qilib kelayotgan “Accenture”. Biz O‘zbekistonga xuddi shunday sifat darajasini va mahalliy sharoitlarga moslashtirilgan qulay yondashuvni taklif qilishga tayyormiz,” — dedi Forchun Joy F. de Lara.

Yirik autsorsing kompaniyalari Markaziy Osiyo bozoriga kirishdan manfaatdor va malakali kadrlarning barqaror oqimiga muhtoj. IT Park yoshlarga mamlakatni tark etmasdan karyera qurish uchun sharoit yaratishga tayyor.

Uchrashuv yakunida tomonlar muzokaralarni davom ettirishga kelishib oldilar va B1-C1 darajasidagi yangi o‘quv dasturlarini ishga tushirish, shuningdek, hamkorlik tarmog‘ini kengaytirish rejalarini belgilab oldilar.

IT Park Uzbekistan mamlakat eksport salohiyatini rivojlantirish va respublika ichida yosh mutaxassislar uchun sifatli imkoniyatlar yaratishga qaratilgan tashabbuslarni qo‘llab-quvvatlashda davom etadi.