IT-Park ekotizimida davlat tili va raqamli madaniyat

Xalqimizning koʻp asrlik madaniy, ilmiy-maʼrifiy va badiiy tafakkuri, intellektual salohiyatining yorqin va bebaho mahsuli boʻlgan oʻzbek tili jahondagi eng boy va qadimiy tillardan biridir. Tarix sahifalarini varaqlasak, 1989-yil 21-oktabr sanasi el-yurtimiz asrlar davomida orzu qilib, intilib va kurashib kelgan “Davlat tili haqida”gi Qonunning qabul qilinishi bilan muhrlanganiga guvoh boʻlamiz. Bu qutlugʻ qadam mamlakatimiz suvereniteti va mustaqilligi sari qoʻyilgan dastlabki dadil odim edi. Aynan ana shu tarixiy hujjatga binoan ona tilimiz mustahkam huquqiy asos va yuksak maqomga ega boʻldi.  

Istiqlol yillarida oʻzbek tili tom maʼnoda davlat tiliga aylanib, xalqimizni yurtimizda erkin va ozod, farovon hayot qurishdek buyuk marralarga safarbar etadigan beqiyos kuch sifatida maydonga chiqdi. Bugun Oʻzbekistonimiz “Milliy tiklanishdan — milliy yuksalish sari” degan bosh tamoyil asosida taraqqiyotning Architectural va ijtimoiy yangi, yanada yuksak bosqichiga koʻtarilmoqda. Mamlakatimizda amalga oshirilayotgan keng koʻlamli islohotlar jarayonida davlat tilining hayotimizdagi oʻrni va nufuzi tobora oshib bormoqda. Siyosiy-huquqiy, ijtimoiy-iqtisodiy, maʼnaviy-maʼrifiy jabhalarda faol qoʻllanilayotgan tilimiz bugun xalqaro minbarlarda ham baralla yangramoqda.

Bugungi globallashuv davrida har bir xalq, har qaysi mustaqil va suveren davlat oʻz milliy manfaatlarini taʼminlash, bu borada avvalo oʻz madaniyatini, azaliy qadriyatlarini va ona tilini asrab-avaylash hamda rivojlantirish masalasiga ustuvor ahamiyat qaratishi tabiiydir. Oʻzbek tilining xalqimiz ijtimoiy hayotida va xalqaro miqyosdagi obroʻ-eʼtiborini tubdan oshirish, unib-oʻsib kelayotgan yoshlarimizni vatanparvarlik, milliy anʼana va qadriyatlarga sadoqat ruhida tarbiyalash maqsadida Oʻzbekiston Respublikasi Prezidentining 2019-yil 21-oktabrdagi “Oʻzbek tilining davlat tili sifatidagi nufuzi va mavqeyini tubdan oshirish chora-tadbirlari toʻgʻrisida”gi PF-5850-son Farmoni qabul qilingan edi.

Aynan ushbu tarixiy Farmon ijrosini ta’minlash bilan birga, o‘zligimizni hamda milliy qadriyatlarimizni yuksak darajada qadrlagan holda, bugun “Dasturiy mahsulotlar va axborot texnologiyalari texnologik parki direksiyasi” MChJ (IT-Park) jamoasida davlat tilida ish yuritish madaniyatini yuksaltirish va xodimlarning yozma nutq savodxonligini yanada takomillashtirish masalasiga alohida e’tibor qaratilmoqda.

Bugungi kunda IT-Park mamlakatimiz taraqqiyotining drayveri sifatida eng shijoatli va eng yosh jamoalardan biri hisoblanadi. Tashkilotimizning hozirgi kundagi faoliyati global miqyosda nafaqat davlatimiz, balki butun dunyo bozorlarida shiddatli sur’atlarda oʻsib bormoqda. Ushbu koʻrsatkichlarning kunma-kun, soatma-soat yuksalishiga sababchi boʻlgan, bir necha xorijiy tillarda bemalol va raven soʻzlashib, xalqaro munosabatlar hamda hamkorlik koʻpriklarini mustahkamlayotgan ilgʻor, gʻayratli va tajribali IT mutaxassislarimizning mehnatlari chin dildan tahsinlarga sazovordir!

Quvonarlisi, tizimimizda faoliyat yuritayotgan yuksak intellektual salohiyatli yosh mutaxassislarimiz xalqaro tillarda dunyo bilan erkin muloqot qilish bilan bir qatorda, oʻz ona tilimizning boy jozibasi va nafosatini ham ish faoliyatlarida yuksak madaniyat bilan namoyon etib kelmoqdalar. Zero, global dunyoni raqamli texnologiyalar bilan zabt etayotgan shijoatli yoshlarimizning oʻz ona tillarida professional, mukammal va bekam-koʻst ijod qilishlari — IT-Park jamoasining oʻziga xos maʼnaviy qiyofasi, milliy gʻururimizning raqamli olamdagi yorqin aksidir.

E’tiborlisi, davlat tilini e’zozlash va uning nufuzini oshirish faqatgina ichki ish yuritish tizimi bilan cheklanib qolmayapti. Shiddatli sur’atlar bilan hayotimizga kirib kelayotgan raqamli transformatsiya jarayonlarida o‘zbek tilining nufuzi va ravonligini saqlash, uni global texnologiyalar bilan hamqadam etish yo‘lida IT-Park direksiyasi jamoasi strategik muvofiqlashtiruvchi markaz bo‘lib xizmat qilmoqda. Aynan ushbu jamoaning tinimsiz amaliy va tashkiliy ko‘magi ostida, bugun ekotizimimizda 18 ta ilg‘or rezident kompaniya samarali faoliyat ko‘rsatmoqda. Ular o‘zbek tilini raqamli dunyoga mukammal integratsiya qilish, uni sun’iy intellekt va eng zamonaviy texnologiyalar tiliga aylantirish boʻyicha mislsiz loyihalarni hayotga tatbiq etmoqdalar. Bu esa milliy gʻururimiz boʻlgan ona tilimizning global texnologik tarmoqlarda yashab qolishi, taraqqiy etishi va kelajak avlodga raqamli meros bo‘lib qolishi uchun qoʻyilayotgan ulkan poydevordir.

Xususan, ushbu yoʻnalishda IT-Park jamoasi va fidokorona izlanayotgan rezidentlarimiz hamkorligida davlat tilini raqamlashtirish borasida olib borilayotgan ishlar bugun oʻzining salmoqli mevalarini bermoqda. Mazkur raqamli loyihalar poydevorida oʻzbek tilidagi jonli nutqni begʻubor tinglab, insonga javob bera oladigan aqlli ovozli yordamchilar va zamonaviy chat-botlar ekotizimi, ona tilimizning imlo, grammatika hamda punktuatsiya qoidalarini onlayn rejimda benuqson nazorat qiluvchi raqamli himoyachilar, shuningdek, tillararo koʻprik vazifasini oʻtovchi professional avtomatlashtритиlgan tarjima tizimlari muvaffaqiyatli rivojlantirilmoqda.

Eng quvonarlisi, ushbu gʻoyalar nafaqat rasmiy muloqotni, balki kelajagimiz boʻlgan yosh avlod dunyoqarashini ham qamrab olib, bolajonlar uchun moʻljallangan interaktiv taʼlim platformalari hamda milliy folklorimizni tarannum etuvchi musiqiy raqamli multseriallar orqali yosh qalblarda ona tiliga boʻlgan cheksiz muhabbat va sadoqat tuygʻularini yuksaltirishga xizmat qilmoqda.

Koʻp til bilish — bu bizning boyligimiz, dunyoga ochilgan eshigimiz va global bozordagi eng katta ustunligimizdir. Biroq, oʻzbek tili — bu bizning oʻzligimiz, qalbimiz va milliy ruhimizdir! Kelajak texnologiyalarini yaratayotgan shijoatli IT-Park jamoasi va uning rezidentlari davlat tilini raqamlashtirish va yozma nutq savodxonligi boʻyicha ham barchaga namuna boʻlishda davom etadi.

Fursatdan foydalanib, barcha aziz hamkasblarimizni va yurtdoshlarimizni yaqinlashib kelayotgan 21-oktabr – Oʻzbek tili bayrami kuni bilan chin qalbdan muborakbod etamiz! Tillari dunyoni, dillari oʻzligini asragan qahramonlarimizga zafarlar yor boʻlsin!

Mualliflar:  

Azamat Karamatov — “Dasturiy mahsulotlar va axborot texnologiyalari texnologik parki direksiyasi” MChJ Bosh direktori;
Jahongir Radjabov — Ijrochi direktor; 
Mirzaulug Tursunbayev — Nazorat, ijro intizomi va ish yuritish bo‘limi boshlig‘i; 
Hayotxon Tuychiyeva — Bosh mutaxassis.