IT Park startaplar uchun namunaviy hujjatlar to‘plamini e’lon qildi

IT Park texnologik loyihalarni rivojlanishning barcha bosqichlarida qo‘llab-quvvatlashni davom ettirmoqda. Ushbu sa’y-harakatlar doirasida startaplar uchun investitsiya bitimlarini tuzish va zarur yuridik hujjatlarni tayyorlashda ko‘maklashish maqsadida namunaviy hujjatlar to‘plami tayyorlandi va e’lon qilindi.

Mazkur hujjatlar to‘plami startaplarning investorlar va hamkorlar bilan ishlash jarayonida duch keladigan asosiy holatlarni qamrab oladi. To‘plam quyidagi hujjatlarni o‘z ichiga oladi:

• Turli xil shakldagi investitsiya shartnomalari (rezidentlar va norezidentlar uchun, bir va ikki transhli);
• Side Letter — O‘zbekiston yurisdiksiyasi sharoitlarini hisobga olgan holda SAFE shartnomasiga qo‘shimcha kelishuv;
• Kelajakdagi kapital to‘g‘risidagi oddiy kelishuv (SAFE) va Convertible Promissory Note — venchur investitsiyalarini jalb qilish vositalari; 
• Maxfiylik to‘g‘risidagi kelishuv (NDA) — rus va ingliz tillarida;
• Yuridik tekshiruv (Due Diligence) uchun hujjatlar ro‘yxati, shu jumladan asosiy ma’lumotlarni tekshirish jadvali;
• Pitch deck namunasi — xalqaro standartlarga mos keladigan investorlar uchun taqdimot tuzilmasi.

Ushbu tashabbusning asosiy maqsadi — startaplarni investorlar bilan muloqotga tayyorlashni soddalashtirish, jamoalarning huquqiy savodxonligini oshirish hamda o‘z hujjatlarini ishlab chiqishdagi vaqt va moliyaviy xarajatlarni kamaytirishdan iborat. Ushbu namunalardan venchur kapitalini jalb qilish, potensial investorlar bilan shartnomalar imzolash, shuningdek, ichki komplayens doirasida foydalanish mumkin. 

Kelgusida ushbu hujjatlar to‘plamni ekotizim ehtiyojlari va qonunchilikdagi o‘zgarishlarga muvofiq to‘ldirib boorish rejalashtirilmoqda. 

Hujjatlarni quyidagi havola orqali yuklab olishingiz mumkin:

https://drive.google.com/drive/folders/1dLGQwphx5rKwgWxczdg6MZCHROiWfymV?usp=sharing