IT Park Uzbekistan Cyberport va Gonkong texnologik kompaniyalari bilan hamkorlikni kengaytirmoqda

IT Park Uzbekistan Kuzatuv kengashi raisi Farhod Ibragimov va IT Park Uzbekistan bosh direktori Azamat Karamatov boshchiligidagi IT Park Uzbekistan delegatsiyasi Gonkongda Cyberport innovatsion markazi rahbariyati va uning ekotizimi kompaniyalari vakillari bilan bir qator uchrashuvlar o‘tkazdi. Muzokaralarning asosiy mavzusi avval imzolangan hamkorlik memorandumini amalga oshirish, shuningdek, startaplar, venchur investitsiyalar va sun’iy intellekt sohalarida qo‘shma tashabbuslarni ishga tushirish bo‘ldi. Tomonlar, shuningdek, O‘zbekiston va Gonkong texnologiya kompaniyalari uchun Markaziy va Sharqiy Osiyo bozorlariga chiqish imkoniyatlarini kengaytirish masalalarini muhokama qildilar.

Cyberport bosh direktori doktor Roki Cheng sun’iy intellekt, fintech, blokcheyn, kiberxavfsizlik, raqamli ko‘ngilochar va boshqa yuqori texnologiyali sohalarda faoliyat yurituvchi 2400 ga yaqin texnologiya kompaniyalari va startaplarini birlashtirgan tashkilot ekotizimini taqdim etdi. Sun’iy intellekt infratuzilmasini rivojlantirish, jumladan, superkompyuter markazini yaratish, sohani davlat tomonidan qo‘llab-quvvatlash dasturlari va innovatsion ishlanmalarni tijoratlashtirish mexanizmlariga alohida e’tibor qaratildi.

IT Park Uzbekistan Kuzatuv kengashi raisi Farhod Ibragimov O‘zbekiston texnologik ekotizimining rivojlanishi haqida gapirib, IT Park Uzbekistan, IT Park Ventures va IT Park Capital fondlari faoliyati, ma’lumotlar markazlarini yaratish loyihalari, IT Park University va Enterprise Uzbekistan tashabbusi haqida ma’lumot berdi. U O‘zbekiston xalqaro texnologik kompaniyalar va investorlar uchun qulay muhit yaratib, mintaqaviy raqamli xab sifatidagi mavqeini izchil mustahkamlab borayotganini ta’kidladi.

Asosiy kelishuvlardan qo‘shma loyihalarni amalga oshirishga o‘tishga alohida e’tibor qaratildi. Tomonlar o‘zaro soft landing dasturlarini ishga tushirish, startaplar va investorlar o‘rtasidagi hamkorlikni rivojlantirish, qo‘shma venchur fondini yaratish imkoniyatlarini o‘rganish, innovatsion infratuzilmani rivojlantirish bo‘yicha tajriba almashish, shuningdek, ta’lim va ishbilarmonlik tadbirlarini o‘tkazishni ustuvor yo‘nalishlar sifatida belgilab oldilar. Bundan tashqari, Cyberport rahbariyati va rezident kompaniyalari sentyabr oyida bo‘lib o‘tadigan ICT Week Uzbekistan’da ishtirok etish uchun taklifnoma oldi.

Muzokaralar Cyberport rezident kompaniyalari bilan alohida biznes-sessiyada davom etdi. Xalqaro texnologiya kompaniyalariga IT Park Uzbekistan’ning afzalliklari, amaldagi davlat tomonidan qo‘llab-quvvatlash choralari, rezident maqomini olish shartlari, soft landing dasturlari, shuningdek, biznes yuritish va O‘zbekiston orqali Markaziy Osiyo bozorlariga chiqish istiqbollari taqdim etildi. Bahodir Ayupov "Enterprise Uzbekistan" imkoniyatlarining alohida taqdimotini o‘tkazib, umumiy huquq asosida shakllantirilayotgan tartibga solish tizimi va investorlarni himoya qilish mexanizmlari haqida so‘zlab berdi.

Muhokamalar davomida biznes vakillari O‘zbekiston bilan hamkorlikka katta qiziqish bildirishdi. Ishtirokchilar sun’iy intellekt, intellektual avtomatlashtirish, raqamli egizaklar, geoaxborot texnologiyalari, kiberxavfsizlik, bulutli infratuzilma, robototexnika, agrotexnologiyalar va korporativ dasturiy ta’minotni ishlab chiqish sohalarida qo‘shma loyihalarni amalga oshirish istiqbollarini ko‘rib chiqdilar. Shuningdek, mamlakatning kadrlar salohiyati, bozorga kirish shartlari, autsorsing imkoniyatlari hamda davlat va xususiy tashkilotlar bilan birgalikda pilot loyihalarni ishga tushirishga katta e’tibor qaratildi.

Biznes-sessiya yakunida kompaniyalar vakillari IT Park Uzbekistan bilan kelgusida hamkorlik qilish, ICT Week Uzbekistan’da ishtirok etish, qo‘shimcha uchrashuvlar o‘tkazish va aniq tashabbuslarni ishlab chiqishdan manfaatdor ekanliklarini tasdiqladilar. O‘z navbatida, IT Park Uzbekistan xorijiy hamkorlarga mamlakat bozoriga kirishning barcha bosqichlarida - biznesni ro‘yxatdan o‘tkazish va mutaxassislarni tanlashdan tortib, ishbilarmonlik aloqalarini o‘rnatish va pilot loyihalarni amalga oshirishgacha hamrohlik qilishga tayyorligini bildirdi.

"Cyberport" bilan hamkorlik xalqaro hamkorlikni mustahkamlash, innovatsion kompaniyalar va venchur kapitalini jalb qilish, startap ekotizimini va sun’iy intellektni rivojlantirish bo‘yicha ilg‘or tajribalarni almashish, shuningdek, O‘zbekiston texnologik kompaniyalarini Gonkong, Xitoy va boshqa Osiyo mamlakatlari bozorlariga olib chiqish uchun yangi istiqbollarni ochadi. O‘zbekiston uchun bu Markaziy Osiyoning yetakchi texnologik va investitsiya markazlaridan biri maqomini mustahkamlash, IT-xizmatlar eksportini kengaytirish va mamlakat raqamli iqtisodiyotiga yangi xalqaro loyihalarni jalb qilish yo‘lidagi qo‘shimcha qadam bo‘ladi.