Senat "Enterprise Uzbekistan" markazini tashkil etish to‘g‘risidagi konstitutsiyaviy qonunni ma’qulladi

Hujjatda markazning ingliz huquqi me’yorlari asosida ishlashi, shuningdek, uning uchun maxsus soliq, bojxona va investitsiya shartlarini joriy etish nazarda tutilgan. 

7-avgust kuni Oliy Majlis Senati IT Park hududida "Enterprise Uzbekistan"ni ishga tushirish uchun qonunchilik bazasini shakllantiradigan "Xalqaro raqamli texnologiyalar markazi to‘g‘risida"gi Konstitutsiyaviy qonunni ma’qulladi. 

Hujjatga ko‘ra, markaz ingliz huquqi tamoyillariga asoslangan maxsus huquqiy rejim doirasida faoliyat yuritadi. Rezidentlar uchun soliq va bojxona sohalarida alohida shartlar, jumladan, bir qator faoliyat yo‘nalishlari uchun imtiyozlar hamda uskunalar, texnologiyalar va zarur materiallarni olib kirishning soddalashtirilgan tartibi ko‘zda tutilgan. 

Bundan tashqari, ro‘yxatdan o‘tish va ma’muriy masalalarni hal qilish uchun "yagona darcha" tamoyilini joriy etish ko‘zda tutilgan. Qonun, shuningdek, markaz ishtirokchilarining intellektual mulki va investitsiyalarini himoya qilishning qo‘shimcha mexanizmlarini nazarda tutadi. 

Senatning baholashicha, markazning ishga tushirilishi O‘zbekistonning raqamli eksportni rivojlantirish bo‘yicha rejalarini amalga oshirish vositalaridan biri bo‘ladi. Xususan, u 2030-yilga borib raqamli xizmatlar eksporti hajmini 5 milliard dollarga yetkazish va 300 mingdan ortiq yuqori maoshli ish o‘rinlarini yaratishga xizmat qilishi kutilmoqda. 

Shuningdek, yangi rejim O‘zbekistonning xalqaro texnologiya biznesi uchun jozibadorligini oshirishi va Apple, Google, Microsoft va Amazon kabi global kompaniyalarning mahalliy bozorga kirishi uchun imkoniyatlar yaratishi kutilmoqda. 

Markaz hududidagi bir qator faoliyat turlari 2100-yilgacha soliqlardan ozod etiladi.