Yashnobod tumanidagi IT HUB loyihasi uchun loyiha-smeta hujjatlarini ishlab chiqish bo‘yicha tanlov e’lon qilindi

“Dasturiy mahsulotlar va axborot texnologiyalari texnologik parki direksiyasi” MChJ Toshkent shahridagi IT HUB obyekti uchun loyiha-smeta hujjatlarini ishlab chiqadigan loyiha tashkilotini tanlash bo‘yicha tanlov e’lon qiladi. 

Loyihalashtirilayotgan obyekt Toshkent shahri, Yashnobod tumani, “Uysozlar” MFY, Ohangrabo ko‘chasi, 39A-uy manzilida joylashgan noturar bino hisoblanadi.

Tanlovning maqsadi texnik topshiriq, O‘zbekiston Respublikasining amaldagi normativ-huquqiy hujjatlari va shaharsozlik me’yorlariga muvofiq loyiha-smeta hujjatlarini ishlab chiqish uchun zarur tajriba, malaka va professional resurslarga ega loyiha tashkilotini aniqlashdan iborat. 

Loyiha doirasida arxitektura va hajmiy-rejaviy yechimlarni, loyiha-smeta hujjatlarining zarur bo‘limlarini, muhandislik tarmoqlari va kommunikatsiyalari, bino fasadi hamda unga tutash hududni obodonlashtirish bo‘yicha yechimlarni ishlab chiqish ko‘zda tutilgan.

Loyiha tashkiloti, shuningdek, ishlab chiqilgan yechimlarning amaldagi qurilish me’yorlari va talablariga muvofiqligini ta’minlashi, hujjatlarni ko‘rib chiqish natijalariga ko‘ra zarur tuzatishlarni kiritishi hamda loyiha qonunchilikda belgilangan kelishish va ekspertiza jarayonlaridan o‘tayotganda uni kuzatib borishi lozim.

Ishlarning aniq tarkibi va hajmi, natijalarga qo‘yiladigan talablar, bajarish muddatlari hamda boshqa shartlar texnik topshiriq va tanlov hujjatlarida belgilangan. 

Tanlovda tegishli faoliyatni amalga oshirish huquqiga ega, o‘xshash yoki taqqoslanadigan obyektlar bilan ishlash tajribasi, malakali mutaxassislari, zarur texnik va tashkiliy resurslari, shuningdek, loyiha hujjatlarini kelishish va ekspertizadan o‘tkazish bo‘yicha tajribaga ega loyiha tashkilotlari ishtirok etishi mumkin. 

Tanlov takliflari yopiq konvertlarda qabul qilinadi. Takliflar xarid komissiyasi tomonidan tanlov hujjatlarida belgilangan mezonlar asosida ko‘rib chiqiladi va baholanadi. Belgilangan talablarga javob beradigan hamda eng yuqori ball to‘plagan ishtirokchi tanlov g‘olibi deb topiladi. 

Tanlov takliflarini qabul qilish muddati: 2026-yil 30-sentabrdan 14-oktabrgacha. 

Topshirish manzili: O‘zbekiston Respublikasi, Toshkent shahri, Mirzo Ulug‘bek tumani, Tepamasjid ko‘chasi, 4-uy. 

Tanlov hujjatlari va texnik topshiriq ishtirokchilarga Buyurtmachi tomonidan belgilangan tartibda taqdim etiladi. 

Qo‘shimcha ma’lumot uchun:

Telefon: (+998) 90-996-0033. 
Elektron pochta: info@it-park.uz

Buyurtmachi: “Dasturiy mahsulotlar va axborot texnologiyalari texnologik parki direksiyasi” MChJ. 

Kerakli hujjatlar bilan quyidagi havolalar orqali tanishishingiz mumkin (1,2).